Om lekker te eet hoef nie altyd duur te wees nie! Deur slim te dink en slim inkopies te doen, kan jy geld spaar. Vir elke duur bestanddeel is daar altyd ’n goedkoper alternatief.
In deel 1 het SARIE-kosredakteur Herman Lensing gewys hoe jy goedkoper chorizo-worsies kan maak met net paprika en varkworsies.
Nóú deel hy sy volgende geheim!
Noorweegse salm
Deesdae is dié vis feitlik onbekostigbaar. Dis ook nie volhoubaar om net vis uit ons see te eet nie. Ja, dis romerig en smelt letterlik weg in jou mond, maar daar is visse uit ander bronne wat net so lekker smaak teen die helfte van die prys.
Woolworths: Norwegian Salmon Portions, R199 vir 500 g
Pick n Pay: Lan Blue Ribbon Norwegian Salmon Fillet, R359,99 per kg
Spaar só geld sonder om geur te verloor
Daar is min dinge wat die smaak en tekstuur van salm kan vervang, maar daar is wel forel wat plaaslik geteel word en beskibaar is teen baie billike pryse.
Indien ’n resep sou vra vir salm, kan jy dit met forel vervang, trouens sekere supermarkte se etikette verwys reeds na forel as salm/forel – dis wanneer die vleis van die forel ekstra pienk en intens is. Daar is ook ander opsies, soos gerookteforel-linte, wat perfek werk in viskoekies of terrienvorms.
Forel
Woolworths: Trout Portions, R99,99 vir 300 g
Pick n Pay: Lan Blue Ribbon Rainbow Trout Fillet, R215,99 per kg
Ander opsies van forel
Woolworths: Oak Smoked Trout Ribbons, R27,99 vir 50 g
Pick n Pay: Three Streams Cold Smoked Trout, R49,99 vir 80 g
Eenvoudige forel-viskoekies
(2 PORSIES)
FOTO: Donna Lewis
Bestanddele
300 g forel, in blokkies gesny
2 knoffelhuisies, fyngekap
1 hand vol vars koljander, fyngekap
30 ml groen Thaise kerriepasta
1 eier
45 ml meel
sout en varsgemaalde swartpeper
60 ml olyfolie
slaaiblare van jou keuse
mayonnaise van goeie gehalte
Aanwysings
Verhit oond tot 200 °C. Meng vis, knoffel, koljander, kerriepasta, eier en meel. Geur goed met sout en peper. Gebruik jou hand en vorm 4 groot viskoekies met die mengsel. Verhit olyfolie tot warm in mediumgroot braaipan. Plaas koekies in warm pan en braai vir sowat 3–5 minute per kant of tot goudbruin. Plaas in oondpan en bak verder vir nog 5–8 minute of tot gaar. Sit warm voor met slaai en mayonnaise van jou keuse.
Lees ook
Eet soos ’n koning vir helfte van die prys
The post Eet soos ’n koning vir helfte van die prys – deel 2 appeared first on SARIE.