Die herfs is op ons voorstoep en as die koue kom inloer, is dit tyd vir bredie! Maar ons weet krag en tyd is duur en bredies vra al twee. Vat kortpad en maak bredie in jou drukkoker. Dis geurig en binne net 45 minute gaar.

FOTO Michael le Grange

The post Maak bredie in net 45 minute appeared first on SARIE.

Wat is ’n Engelse tee sonder skons? En wat is skons sonder room en konfyt? Bak skons vir jou high tea of bedien dit Sondagoggend vir ontbyt. Mari-Louis Guy maak vir dié resep sommer self konfyt in ’n kits.

maak 12 – 15 skons

280 g (500 ml) koekmeel
10 ml bakpoeier
2,5 ml sout
125 g (135 ml) koue botter, in blokkies gesny
1 eiergeel
125 ml melk
Growwe baksuiker (opsioneel)

Vir die room

250 ml vars room
30 ml versiersuiker
5 ml vanieljegeursel

Vir die vinnige kersiekonfyt

225 g (250 ml) bevrore kersies
100 g (125 ml) suiker
60 ml water

Meng die kersies, suiker en water in ’n kastrol oor matige hitte en laat prut tot dik en stroperig (sowat 15 minute). Laat afkoel.

Voorverhit die oond tot 200 °C. Gebruik ’n silikoonbakmat of spuit ’n bakplaat met kleefwerende kossproei.

Plaas die meel, bakpoeier, sout en botter in ’n voedselverwerker en pols saam. Meng die eiergeel met 60 ml melk. Gooi in die verwerker en pols tot die deeg bymekaar kom, voeg nog melk by indien nodig.

Keer uit op ’n werkoppervlak wat liggies met meel bestuif is. Vou die deeg met jou hande saam en vorm ’n ruwe sirkelskyf. Rol die deeg ongeveer 1 cm dik uit en druk klein 5 cm-sirkels uit met ’n koekiedrukker. Rangskik die skons op die bakmat of bakplaat. Smeer die bokante met die oorblywende melk en sprinkel growwe suiker oor, indien gebruik.

Bak vir 8 – 10 minute of tot die skons goed uitgerys is en die bokante goudbruin is. Laat heeltemal afkoel.

Gebruik die mengbak en die klitshegstuk van ’n elektriese menger en klits die room en versiersuiker tot stywe punte vorm. Voeg die vanieljegeursel by en klits deur.

Sny die skons middeldeur, smeer met kersiekonfyt en versier met room. Die room kan ook gegeur word deur die kersiestroop deur te roer.

Bron: Mari-Louis Guy

Besoek hulle webtuiste, Facebook-, Twitter– of Pinterest-blad.

The post Mari-Louis Guy se skons appeared first on SARIE.

Soufflé is een van die mees klassieke Franse geregte. Dit is regtig nie baie moeilik om te maak nie: Jy maak ’n witsous, voeg jou kaas of wat ook al by, en dan klop jy die eierwitte styf en vou dit in.

• 250 ml melk
• 20 ml botter
• 30 ml meel
• 3 eiergele
• 100 g gruyère-kaas, fyngerasper
• 5 vars basilieblare, fyngekap
• sout en peper
• 5 eierwitte
• 30 ml fyn parmesaankaas

Verhit oond tot 200 °C. Verhit melk effens. Smelt botter in ’n diep kastrol en voeg meel by. Roer die mengsel tot dit ’n pasta vorm. Voeg verhitte melk bietjie vir bietjie by en roer goed. Haal kastrol van hitte af. Laat effens afkoel. Voeg eiergele een vir een by en klits goed ná elke byvoeging. Plaas terug op die stoofplaat en hou aan met roer tot mengsel verdik het. Haal af van hitte en voeg gruyère-kaas en basiliekruid by. Geur met sout en peper.

Wenk: Jy kan in dié stadium die mengsel laat staan en dan kan jy die geklitste eierwitte invou net voor jy dit wil bak.

Klits eierwitte styf en vou versigtig by kaasmengsel in. Skep in klein koppies of ramekin-bakkies, maar maak dit net ¾ vol. Sprinkel fyn parmesaankaas bo-op. Trek met ’n mes ’n sirkel teen die rand van bakkie of koppie om te verseker dat die soufflé mooi rys. Plaas op bakplaat en sit in oond. Stel nou onmiddellik die temperatuur af na 180 °C en bak vir 20 minute. Haal uit en sit dadelik voor.

The post Kaas-en-basilie-soufflé appeared first on SARIE.

’n Sweetie Pie is ’n geliefde lekkerny wat dikwels onweerstaanbaar op die kafee se rak wag. Maar jy kan dit sommer self by die huis maak. Sit dit in ’n mooi boksie en gee dit as ’n Moedersdaggeskenk!

genoeg vir 12 lekkers

• 200 g donkersjokolade, gesmelt
• 8 gelatien-velle (kyk by jou supermark se gebak-afdeling)
• 200 ml koue water
• 400 g (480 ml) strooisuiker
• 100 ml warm water
• 2 ml sout
• 30 ml haselneut-likeur, of 10 ml vanieljegeursel
• 10 g haselneute, gekap
• 10 ml pienk koskleursel
• 12 karamelgeur Marie-koekies

Verf die holtes van 12 klein ronde silikoon-vormpies met gesmelte sjokolade en laat stol in vrieskas. Hou so aan tot jy elke vorm met 5 lae sjokolade bedek het.

Week gelatien in 200 ml koue water tot sag. Plaas bakkie met water en sagte gelatien in mikrogolfoond en verhit tot gesmelt. Plaas gesmelte gelatien in ’n elektriese menger. Gooi strooisuiker en 100 ml warm water in ’n kastrol. Verhit oor lae hitte en roer tot suiker opgelos is. Kook suikerstroop tot sowat 120 ˚C op ’n suikertermometer. (As jy nie een het nie: Dis gewoonlik reg sodra die buiterand van die suikerstroop van kleur verander.) Sit menger aan en gooi warm stroop in ’n dun straaltjie by. Voeg sout en likeur of geursel by. Klits vir 12 – 15 minute teen hoë spoed of tot die mengsel blink en stywe punte vorm. Voeg gekapte neute en kleursel by.

Verdeel mengsel tussen sjokolade-holtes en plaas ’n Marie-koekie bo-op elkeen. Smeer res van sjokolade bo-oor om koekie te bedek. Laat stol in yskas vir 20 – 30 minute. Keer versigtig uit. Sit voor, of draai in bakpapier toe en gee dit as geskenke.

The post Maak jou eie Sweetie Pies appeared first on SARIE.

Hier’s ses soet tertjies vir ’n behoorlike high tea. Koop klaargemaakte tertdoppies by jou bakkery – dan is die meeste van die werk gedoen!

Sjokolade-tertjies

Bring 250 ml room tot kookpunt en gooi oor 100 g gekapte donkersjokolade. Roer tot gladde mengsel. Vul 12 klein tertdoppies met die mengsel. Breek 100 g sjokolademoutballe fyn en sprinkel oor.

Piesang-en-karamel-tertjies

Roer 1 x 365 g-blik karamel-kondensmelk tot glad. Skep in spuitsak met 1 cm-sterpunt. Vul 12 klein tertdoppies met karamel. Sny 2 piesangs in dun skywe en pak bo-op. Sprinkel 100 g gesmelte donkersjokolade oor en rond af met witsjokolade-bal.

Suurlemoen-meringue

Vul 12 klein tertdoppies met 500 g-fles suurlemoensmeer (lemon curd). Klits 3 eierwitte met elektriese klitser tot sagte punte vorm. Voeg 100 g (125 ml) strooisuiker geleidelik by terwyl menger loop. Hou aan klits tot blink en styf. Skep in spuitsak met ronde 1 cm-punt. Spuit rosette bo-op suurlemoensmeer. Brand bruin met kombuisvlam.

Toffie-appel-tertjies

Bring 200 g (250 ml) suiker en 30 ml water tot kookpunt in middelslagpot. Laat kook tot goue karamel vorm. Dreineer 1 x 365 g-blik baba-appels met stingels. Doop vinnig in warm karamel en laat stol op kleefvrye bakplaat. Roer 1 x 365 g-blik karamel-kondensmelk tot glad. Skep in spuitsak met 1 cm-sterpunt en vul 12 klein tertdoppies met karamel. Plaas ’n toffie-appel bo-op elk.

Vla-tertjies

Meng 45 ml mielieblom en ’n bietjie water tot gladde pasta. Verhit nou 500 ml winkelvla oor matige hitte tot net onder kookpunt. Voeg mielieblompasta by terwyl jy vla roer. Hou aan roer oor lae hitte tot vla dik en glad is – sowat 5 – 8 minute. Vul 12 klein tertdoppies met warm vla. Laat stol en versier elk met halwe aarbei.

Witsjokolade-tertjies

Bring 250 ml room tot kookpunt en gooi oor 100 g fyngekapte witsjokolade. Vul 12 klein tertdoppies met sjokolade. Laat stol in yskas vir 1 uur. Versier met 125 g vars frambose.

The post 6 soet tertjies in ’n kits appeared first on SARIE.

’n Souttert is altyd ’n staatmaker! Hier’s ’n verskeidenheid soutterte waarvan jy kan kies.

Groente-quiche

Quiche met gekaramelliseerde uie en bokmelkkaas

Aspersie-quiche

Gesonder quiche Lorraine

The post 4 heerlike quiches vir die souttand appeared first on SARIE.

Heerlik lig, maklik én goedkoop! En die heel beste is – jy kan dit ook in die mikrogolfoond maak!

• 200 g donkersjokolade
• 2 x 380 g-blikke ingedampte melk
• 300 g malvalekkers

Plaas een blik ingedampte melk in die yskas. Smelt sjokolade en die ander blik se ingedampte melk saam oor lae hitte. Voeg malvalekkers by en smelt verder terwyl jy af en toe roer. Laat eenkant afkoel tot later benodig. (Jy kan die bestanddele op die stoof of in ’n mikrogolfoond smelt.)

Gooi die verkoelde blik ingedampte melk in bak van ’n elektriese menger. Klits op hoë spoed tot dik en skuimerig, sowat 3 minute.

Stel die menger op ’n stadiger spoed en voeg die sjokolade-malvalekkermengsel by. Verdeel mengsel in opdienbakkies en plaas in yskas vir minstens een uur. Die mengsel skei in twee lae, met ’n baie lekker tekstuur van skuim bo-op en sjokolade-jellie onder. Sit voor met styfgeklopte room en vars bessies van jou keuse.

Kyk ook hoe maak jy … 

• Spek-en-kaaswiele

• Herman se sjokoladekoek met ganache

• Eenpot-pasta (in minder as 15 minute!)

• Viëtnamese rolletjies

The post Sjokolade-mousse met net 3 bestanddele appeared first on SARIE.

Arepas, noem die Suid-Amerikaners hierdie gewilde papkoekies. Hulle gebruik ’n fyngemaalde mieliemeel wat effens verskil van ons tradisionele pap. 

genoeg vir 4

•  250 ml mieliemeel
•  500 ml water
•  5 ml sout
•  30 ml olyfolie
•  30 g (35 ml) botter
•  1 kg wors

Vir die smoor
•  60 ml olyfolie
•  1 ui, fyngekap
•  2 knoffelhuisies, fyngekap
•  2 x 400 g-blikke gekapte tamaties
•  10 ml suiker
•  sout en varsgemaalde swartpeper

Plaas mieliemeel, water en sout in ’n groot glasmengbak. Kook sowat 5 minute in mikrogolfoond wat op hoog gestel is. Haal uit en roer goed met houtlepel. Plaas vir nog 5 minute in mikrogolfoond (die pap sal baie styf wees). Laat effens af-koel. Verdeel in 4 ewe groot balle en druk plat met handpalm. Verhit olie en botter in ’n kleefvrye pan. Braai pap weerskante tot bros en goudbruin. Hou eenkant warm. Braai wors oor kole of in oond tot gaar.

Vir die smoor Verhit olie in ’n pan en braai ui tot sag. Voeg knoffel, tamaties en suiker by en geur met sout en peper. Verlaag hitte en prut so 15 minute. Sit papkoekie met wors en smoor warm voor.

FOTO Willem Lourens

Lees nou

Bobotie-fillo-pakkies

Geroosterde vleiskebabs

Geroosterde hoender met paprika

Papkoekies met boerewors en tamatiesmoor

The post Papkoekies met boerewors en tamatiesmoor appeared first on SARIE.

Ek is baie anti-kossnobs en mense wat dink sekere dinge is te kommin vir hul tafel. Laat ek dit nou maar ruiterlik erken: Ek hou van cremoratert. Noem my maar wat jy wil, kommin, eenvoudig of platvloers, ek gee regtig nie om nie. Ek dress haar graag met sjokolade, karamel of gekapte neute op. Gee jou verbeelding vrye teuels en sit haar met baie styl voor.

Die heerlike Sjokolade-cremoratert verskyn in Herman se tweede kookboek, Nog ’n VOORSKOOT.

1 x 10 g-sakkie gelatien

• 30 ml water

• 1 x 200 g-pakkie sjokoladeklapperkoekies

• 100 g (110 ml) botter, gesmelt

• 1 x 500 g-sakkie Cremora

• 250 ml yskaswater

• 2 x 385 g-blikke kondensmelk

• 250 ml suurlemoensap

• 5 ml vanieljegeursel

• 60 ml baie donker kakaopoeier

• 200 g frambose

• 100 g sjokolade-moutbolletjies

Sprinkel die gelatien oor die water en laat staan tot sponsagtig. Plaas die koekies in ’n voedselverwerker en verwerk tot fyn. Voeg die botter by en meng tot ’n klam mengsel. Spuit ’n 30 x 20 cm- reghoekige losboompan goed met kleefwerende kossproei. Voer die pan met die koekiemengsel uit. Maak die Cremora met die yskaswater aan en plaas dit in die bak van ’n elektriese menger. Voeg die kondensmelk by en klits dit by hoë spoed tot dik en romerig, 5 – 8 minute. Voeg die suurlemoensap geleidelik by terwyl die menger loop en hou aan klits tot dik en romerig. Voeg die geursel en kakao by. Smelt die geweekte gelatien in jou mikrogolf en meng dit goed by. Skep die vulsel in die kors en laat sowat 2 – 3 uur in die yskas staan om te stol. Ontvorm die tert op ’n opdienbord. Pak die frambose en sjokolade-moutbolletjies bo-op. Sit met sjokoladesous voor.

FOTO Donna Lewis

The post Sjokolade-cremoratert appeared first on SARIE.

Dit bly ’n ou-gunsteling!

(sowat 16 blokkies)

Kors
• 250 g (445 ml) koekmeel
• 10 ml bakpoeier
• knippie sout
• 125 g (135 ml) botter
• 25 g (30 ml) strooisuiker
• 3 eiergele 15 ml water

Bolaag
• 1 blik 450 g All Gold Super Fine Apricot Jam oF All Gold Strawberry Jam
• 3 eierwitte
• 250 g (315 ml) suiker
• 200 g (625 ml) fyn klapper

Verhit jou oond tot 160 ºC. Sif die koekmeel, bakpoeier en sout saam. Vryf die botter in die meelmengsel tot dit soos broodkrummels lyk. Voeg die strooisuiker by en meng deur. Klits die eiergele en water saam. Voeg dit by die meelmengsel en maak aan tot ‘n deeg. Smeer ‘n bakplaat van sowat 30 x 23 cm goed met botter. Druk die deeg met jou hande in die bakplaat. Smeer die konfyt van jou keuse op die deeg. Klits die eierwitte styf. Voeg die suiker lepel vir lepel by tot jy ‘n stywe meringue het. Roer die klapper deur en sprei die meringue eweredig oor die konfyt. Bak vir 35 – 40 minute. Haal uit en sny in blokkies. Laat afkoel in die bakplaat voor jy die blokkies uithaal.

The post Ou-gunsteling: Hertzoggies appeared first on SARIE.

Ystervarkies is ’n heerlike bederf. Maar nou is dit nóg meer dekadent!

(18 porsies)

– 200 g donkersjokolade, grofgekap

– 1 x basisresep (ongebak)

– 700 g fyn klapper

Vir die stroop

– 60 ml kakaopoeier

– 375 ml water

– 600 g suiker

– 15 ml botter

– 5 ml vanieljegeursel

Verhit oond tot 180 grade. Vou gekapte sjokoladesplinters by basisresep in. Voer twee vierkantige panne van 25 x 25 cm uit met bakpapier en spuit met kleefwerende kossproei. Verdeel beslag tussen panne en bak vir 15 – 20 minute of tot goudbruin en gaar. Laat afkoel en keer uit. Bring intussen al die bestanddele vir die stroop tot kookpunt in ’n middelslagpot. Gebruik ’n skerp mes en sny die kante van
die koek netjies af. Verdeel elke koek in nege blokkies. Doop vinnig in sjokoladestroop en rol dan in klapper. Sit voor.

The post Sjokoladesplinter-ystervarkies appeared first on SARIE.

Malvapoeding is sekerlik een van ons gewildste poedings. Voeg geblikte pere by en verander dit in ’n heeltemal nuwe lekkerny.

genoeg vir 4 – 6

• 13 g (15 ml) botter
• 100 g (125 ml) suiker
• 1 eier, geklits
• 140 g (250 ml) koekmeel
• knippie sout
• 5 ml koeksoda
• 95 ml melk
• 15 ml fyn appelkooskonfyt
• 15 ml bruin asyn
• 2 blikke (240 g elk) baba-pere, gedreineer

Verhit oond tot 180 °C. Room botter en suiker saam in ’n elektriese menger se mengbak. Die botter lyk dalk min, maar dit werk goed. Voeg eier by en klits goed tot sag en romerig. Sif meel en sout saam en voeg by bottermengsel. Klits goed tot glad. Meng koeksoda met melk en voeg by meelmengsel saam met die konfyt en asyn. Meng goed. Skep in langwerpige pan van sowat 30 x 10 cm wat met kleefwerende kossproei gespuit is. Rangskik die pere in die deeg en plaas in oond. Bak sowat 40 minute. Toets met ’n dun pennetjie om seker te maak die poeding is gaar – die pennetjie moet skoon uitkom. Maak intussen die sous.

Sous

• 175 ml ingedampte melk
• 125 ml warm water
• 200 g (250 ml) suiker
• 13 g (15 ml) botter
• 2 ml vanieljegeursel

Gooi ingedampte melk, warm water en suiker in ’n kastrol. Bring tot kookpunt terwyl jy roer. Die suiker moet gesmelt wees voor die mengsel kook. Voeg botter en geursel by. Wanneer botter gesmelt is, gooi warm sous oor poeding. Sit voor met vanieljeroomys.

FOTO Micky Hoyle

The post Peermalvapoeding appeared first on SARIE.

Kosgiere kom en gaan byna soos Suid-Afrika se ministers van finansies. Maar hierdie nuwe kos-trend het ons oog gevang! Al ooit gehoor van “wolk-eiers”? Dis besig om Instagram oor te neem, en nou kan jy dit ook eet.

A post shared by Simo Kauppinen (@sim.kau) on May 17, 2017 at 2:23am PDT

Lyk dit bekend? As jy kykNET se Kokkedoortjie-reeks volg, sal jy onthou Christian Cloete het dit in episode twee gemaak.

“Wolk-eiers” kan vergelyk word met die Franse pof-omelet waar die eiers styfgeklop word om ’n wolkerige voorkoms te verkry. Maar met wolk-eiers word slegs die eierwit geklits en halfgaar gebak voordat die eiergeel heel bo-op geplaas en als dan verder gebak word.

Dis prettig en ongelooflik lekker! Dit lyk dalk moeilik, maar dis eintlik heel eenvoudig.

Ons deel spesiaal ’n resep met jou. Sit dit voor met eier se perfekte pasmaats – brosgebraaide spek en ’n sny roosterbrood.

A post shared by Food N Info (@foodninfo) on May 16, 2017 at 2:54pm PDT

Basiese wolk-eiers

genoeg vir 2

Bestanddele

• 4 vars eiers
• ½ teelepel kremetart
• Seesout en swartpeper

Metode

Verhit die oond tot 230 °C. Skei die eiers baie versigtig en hou die eiergele apart. Klop die eierwit tot medium punte, voeg dan die kremetart by en klop tot stywe punte. Skep die geklopte eierwitmengsel in vier “nes”-vorms op ’n gesmeerde bakplaat. Maak die nessies netjies met die agterkant van ’n eetlepel en maak ’n klein holte in die middel van elke nes om die eiergeel later in te plaas. Bak die nessies vir 5 minute. Besprinkel met sout en peper en plaas ’n eiergeel in elke holte. Bak vir nog 2 minute om die perfekte sagte, loperige eier te kry.

The post Het jy eiers al só geëet? appeared first on SARIE.

’n Behoorlike bruinbredie bestaan net uit vleis en aartappels.Omdat jy lamsteaks gebruik, is die bredie nie so vetterig nie. Dis ook maklik, want alles gebeur in die oond.

genoeg vir 4

• sowat 60 ml olyfolie
• 950 g lamsteaks
• 2 uie, in wiggies gesny
• sap van 1 suurlemoen
• 2 lourierblare
• 2 takkies vars tiemie
• sout en varsgemaalde swartpeper
• 8 klein Mediterreense aartappels, geskil

Verhit oond tot 180 °C. Gooi helfte van olyfolie in ’n oondbraaibak. Pak steaks in bak. Pak uie in bak en gooi suurlemoensap oor. Plaas lourierblare en tiemietakkies bo-op. Gooi res van olyfolie oor. Geur met sout en peper. Maak bak toe met tinfoelie en oondbraai sowat 1 uur in warm oond. Haal uit en verwyder tinfoelie. Pak aartappels om die vleis en oondbraai nog sowat 1 uur tot aartappels gaar is. As dit te droog raak, kan jy ’n klein bietjie water of witwyn byvoeg. Sit voor met ’n takkie vars lourierblare bo-op.

The post Bruinbredie met lam, uie en aartappels appeared first on SARIE.

Die inspirasie hiervoor was broodstokkies wat jy saam met sop eet. Ek het vetkoek só gebraai en dis heerlik!

genoeg vir 8

• 660 ml louwarm water
• 1 x 10 g-sakkie kitsgis
• 10 g sout
• 20 ml heuning
• 30 ml olyfolie
• 150 g cheddarkaas, fyngerasper
• 250 g spek, baie fyn gekap
• 1 kg (1 785 ml) koekmeel
• sonneblomolie vir diepbraai

Plaas water, gis, sout, heuning en olyfolie in elektriese menger se mengbak. Voeg kaas en spek by. Gooi ²/3 van meel by en meng met deeghaak by matige spoed. Gooi laaste ¹/3 van meel geleidelik by en meng tot ’n stywe, kniebare deeg vorm. Verhoog mengerspoed en knie 8 – 10 minute met deeghaak of tot ’n elastiese, gladde mengsel vorm. Plaas deeg in groot bak wat met sonneblomolie gesmeer is. Bedek met kleefplastiek en laat rys 30 – 40 minute op warm plek of tot dubbel in volume. Knie af. Herhaal proses drie keer. Keer deeg uit op meelbestrooide werkvlak en sny in stukke van 80 g – dis belangrik om die deeg te weeg sodat al die vetkoeke ewe groot is. Rol elke deegstuk in lang broodstokkie. Verhit olie in pot wat groot genoeg is sodat broodstokkies regop daarin kan pas. Olie moet medium-warm wees – as dit te warm is, sal die stokkies brand voor dit deurgaar is. Braai 8 – 10 minute of tot goudbruin en bros. Dreineer op kombuispapier en sit louwarm voor.

The post Kaas-en-spekvetkoekstokkies appeared first on SARIE.

Vorm jou vetkoek soos die tipies Italiaanse pantoffelbroodjie en gee dit ekstra geur met komyn.

genoeg vir 8

• 10 g kitsgis
• 10 g sout
• 300 ml louwarm water
• 45 ml heuning
• 5 ml heel komynsaad
• 500 g (890 ml) koekmeel
• ekstra koekmeel vir uitrol
• olie vir diepbraai
• kerriemaalvleis van jou keuse

Plaas gis, sout, water, heuning en komyn in middelslag-mengbak. Roer met draadklitser tot gemeng. Voeg meel geleidelik by en meng verder tot stywe, kniebare deeg vorm. Keer uit op skoon werkvlak en knie tot gladde, ferm deeg. Sit in skoon bak wat met olie gesmeer is. Laat rys op warm plek tot dubbel die volume. Keer uit op meelbestrooide werkvlak en druk deeg plat tot sowat 1,5 cm dik. Sny reghoekige stukke deeg van sowat 10 x 4 cm met skerp mes uit. Plaas op houtplank wat met nog meel besprinkel is en laat rys op warm plek tot dubbel die volume, sowat 20 minute. Terwyl deeg rys, verhit olie tot medium-warm – as dit te warm is, sal die vetkoek brand voor dit deurgaar is. Diepbraai uitgerysde stukke deeg 8 –10 minute of tot goudbruin en bros. Dreineer op kombuispapier. Sit voor met kerriemaalvleis of net met botter en konfyt.

The post Ciabatta-vetkoek appeared first on SARIE.

’n Maklike resep van my ma. Sy het dit dikwels vir ons gemaak en voorgesit met lekker cheddar en heuning.

genoeg vir 12

• 200 g (360 ml) koekmeel
• 15 ml bakpoeier
• 20 ml suiker
• 5 ml sout
• 2 eiers
• 125 ml melk
• sonneblomolie vir diepbraai

Plaas al die bestanddele behalwe die olie vir diepbraai in ’n mengbak. Meng saam tot slap deeg vorm. Verhit olie tot medium-warm – as dit te warm is, sal die vetkoek brand voor dit deurgaar is. Doop twee eetlepels in warm olie en skep dan bietjie deeg uit met een lepel. Krap deeg met tweede lepel in warm olie in. Hou aan tot al die deeg op is. Diepbraai 8 –10 minute of tot goudbruin en bros. Dreineer op kombuispapier. Sit die vetkoekies warm voor met kaas en heuning.

The post Slapdeegvetkoek appeared first on SARIE.

Ek is mal oor soet doughnuts, maar maak ’n slag iets souts daarvan. Dit lyk boonop indrukwekkend.

genoeg vir 6

• koekmeel vir uitrol
• 500 g-sakkie winkeldeeg
• sonneblomolie vir diepbraai
• 100 ml appelkooskonfyt
• 200 g cheddarkaas, gerasper

Sprinkel bietjie koekmeel op werkvlak en druk deeg plat met vingerpunte tot sowat 1,5 cm dik. Sny 6 sirkels uit met ronde koekiedrukker van 10 cm. Gebruik kleiner ronde drukker van 2 cm en sny gaatjie in elke groot sirkel. Plaas deegsirkels op houtplank wat met nog meel besprinkel is en laat rys op warm plek tot dubbel in volume, sowat 20 minute. Terwyl deeg rys, verhit olie tot medium-warm – as dit te warm is, sal die vetkoek brand voor dit deurgaar is. Diepbraai gerysde deegsirkels 8 – 10 minute of tot goudbruin en bros. Dreineer op kombuispapier. Sny middeldeur en smeer konfyt op een helfte. Sprinkel kaas oor en plaas ander helfte van vetkoek bo-op. Sit voor.

The post Doughnutvetkoek appeared first on SARIE.

Dis ’n ou Suid-Afrikaanse gunsteling, vetkoek met botter en konfyt. Maar hy’s net so lekker met doodgewone pitmielies of kerriemaalvleis. Hier is een vir elkeen se smaak…

Ciabatta-vetkoek

Kaas-en-spekvetkoekstokkies

Slapdeegvetkoek

The post Vetkoek op 4 ander maniere appeared first on SARIE.

Ná weke op ons TV-kassie kan ons steeds nie glo hoe talentvol die Kokkedoortjies is nie! Ja, die deelnemers van kykNET se Kokkedoortjies weet hoe om hul lyk sjef in die kombuis te hou. Maar hoe goed ken hulle hul kosterme?

SARIE het gaan uitvind!

Wat is mulligatawny?

Ja, dis ’n Engelse sop met Indiese geure!

The post Kokkedoortjies raai: Wat is mulligatawny? appeared first on SARIE.