Vir my is sjokolade en neute ’n wenkombinasie. Die tert is so ryk, jy kan gewoonlik net ’n klein stukkie op ’n slag eet.
Genoeg vir 8 – 10
– 200 g sjokoladekoekies (Romany Creams)
– 60 ml gesmelte botter
– 200 g gepelde haselneute
– 100 g 70%-donkersjokolade, in stukke gebreek
– 150 ml room
– 15 ml kakao, gesif
– 175 g braambessies (blackberries)
– versiersuiker vir oorsif
Verhit oond tot 180 °C. Kap koekies fyn in voedselverwerker. Voeg gesmelte botter by en meng goed. Spuit ’n lang losboom-quiche-pan van 35 x 11 cm met kleefwerende kossproei. Gooi koekiemengsel in pan en druk stewig vas op bodem en lang die kante. Plaas in oond en bak 10 minute. Haal uit en laat kors afkoel.
Rooster haselneute ’n paar minute in ’n kleefvrye pan tot net-net bruin. Rangskik neute op kors. Plaas sjokolade en room in ’n bak wat pas oor ’n kastrol met water wat pas gekook het. Laat sjokolade en room smelt. Roer nou en dan. Voeg kakao by en meng goed. Gooi sjokolademengsel oor neute en plaas in yskas tot gestol – 1 – 2 uur. Haal tert uit pan en sprinkel braambessies oor. Sif bietjie versiersuiker bo-op.
FOTO Micky Hoyle
The post Heerlike sjokolade-haselneuttert appeared first on SARIE.