As jy van die Noord-Kaap kom, ken jy dié manier van gaarmaak baie goed. Die ribbetjies word stadig oor die kole gebraai tot goudbruin en bros. Eenvoudige kos, maar lekker.
GENOEG VIR 6
• 24 lamsribbetjies
• 60 ml bruin asyn
• varsgemaalde growwe sout
• varsgemaalde swartpeper
• 60 ml heel koljanderkorrels, fyngestamp
Verhit kole tot matig warm of verhit oond tot 160 °C. Pak ribbetjies op toeklaprooster of in oondbraaibak. Sprinkel asyn oor en vryf goed in vleis in met vingerpunte. Geur met sout en swartpeper. Sprinkel koljander oor. Braai stadig met vetkant na bo tot vet uitgebraai is – sowat 1 uur. Draai om as jy oor kole braai tot vet goudbruin en bros is of bak goudbruin onder oond se rooster-element. Sit voor met ekstra fyn koljander.
The post Lamsribbetjies met koljander en bruin asyn appeared first on SARIE.