Spaarwenke wanneer jy kos-inkopies doen

Met die ekonomie wat knyp en kospryse wat bly styg, kan inkopies ’n stresvolle affêre raak. Spaar só deur goed te beplan.

1. Moet nooit honger winkels toe gaan nie – maak altyd seker dat jy iets eet voor jy jou weeklikse inkopies aanpak. Dit verseker dat jy geen onnodige items in jou mandjie laai nie.

FOTO Unsplash (William Iven)

2. Maak ’n inkopielys voordat jy winkels toe gaan en bly daarby. Vermy impulsiewe aankope soos lekkernye en gaskoeldranke.

3. Beplan jou week se spyskaarte vooruit en koop daarvolgens.

4. “Shop around” – bespaar weekliks deur verskeie supermarkte se winskopies dop te hou.

5. Vergelyk pryse en gehalte – onthou dat “no name”-handelsmerke en “buy bulk and save” nie noodwendig goedkoper is nie. Kyk deeglik deur die winkelrakke – die duurder items word gewoonlik op ooghoogte geplaas. Om te koop volgens ’n begroting beteken gewoonlik om jou rande te rek en te buig!

Hier is ’n lekker maklike bekostigbare resep onder R100 vir ’n gesin van 4.

Macaroni-en-kaasgebak

FOTO Willem Lourens

Hier is ’n lekker maklike bekostigbare resep onder R100 vir ’n gesin van 4.

genoeg vir 4

• 100 g (120 ml) botter
• 1 liter melk
• 500 ml hoenderaftreksel
• 250 ml room
• 500 g pasta (macaroni of skroewe)
• 400 g sterk cheddarkaas, gerasper

Verhit oond se roosterelement. Verhit botter, melk, aftreksel en room tot kookpunt in ’n groot kastrol. Roer goed met ballonklitser tot botter gesmelt het (moenie bekommerd wees as die mengsel dalk skif nie – klits dit net vinniger sodat dit weer bymekaarkom). Voeg die pasta by en verlaag hitte tot matig.

Roer nou en dan met houtlepel. Prut sowat 15 minute tot pasta gaar is. Voeg helfte van kaas by pasta en roer goed deur. Sprinkel res van kaas bo-oor en plaas onder warm roosterelement tot bros en goudbruin. Sit warm voor.